02 Xan Un propósito de convivencia para o ano que comeza
Como é tradición por estas datas, apuramos a facer balance do ano que remata e unha lista de bos propósitos e desexos para o ano que comeza. 2023 deixa moitas cousas para o recordo e para a historia da entidade. Foi o ano do 25 aniversario do Programa Mentor, que celebramos por todo o alto cun congreso de tres días en Ourense. Ata alí achegáronse case 300 persoas e expertos de diversas partes do mundo. Como outro dos fitos de 2023, estreamos tamén a obra de teatro ‘Soños’ no Teatro Principal de Santiago. Tivemos moito que celebrar.
Porén, rematamos decembro co descorazonador ataque cara a exposición ‘Resalire’ en Ourense. Atopamos a metade das fotografías das mozas e mozos tutelados destrozadas, cun ensañamento progresivo e maior segundo máis oscura era a cor de pel do rapaz. Un delito de odio intolerable na nosa sociedade, que respondemos cun acto simbólico de reparación das fotografías danadas. Ademais da Universidade de Vigo, estivemos acompañadas por gran parte da veciñanza de Ourense que apoia a diversidade e a xustiza. Ata alí levamos unha mensaxe clara: #StopODIO.
Ese é o propósito co que comezamos este 2024.
As fotografías realizadas por Fuco Reyes para ‘Resalire‘ seguirán en pé percorrendo as diversas cidades e vilas galegas, espallando esa mensaxe de convivencia, diversidade e respecto. Igual que a obra de teatro ‘Soños‘, que dirixe Tamara Canosa, e que xa chegou a moitos centros educativos galegos. Nas novas xeracións é onde debemos poñer a confianza dun mundo máis xusto. Cremos firmemente na cultura como unha ferramenta poderosa para falarlle á cidadanía cara a cara e loitar pola desestigmatización da mocidade tutelada.
Elas e eles, as mozas e mozos do sistema de protección, son os protagonistas, o motor do noso día a día, tamén no 2024. Agardamos que este ano traia cousas boas en todos os sentidos e que poidamos seguir contando cunha rede de apoio tan grande como ata agora. Mesmo máis, para poder seguir traballando na transición á vida adulta de moitas mozas e mozos.