‘A Tribo’: a nosa historia contámola nós

Mozas e mozos de entre 14 e 23 anos constrúen o seu propio relato social da xuventude nunha experiencia de vídeo participativo que compartimos Agareso e Igaxes.

Os prexuízos son a antesala da discriminación.

E cando afectan a persoas que xa parten dunha situación vulnerable, poden chegar a converterse nun estigma moi doloroso.

Non é certo, por exemplo, que o alumnado con dificultade nos estudos non teña vontade de aprender. Nin é certo que a mocidade tutelada estea nun centro de protección por facer algo malo. Non son máis que estereotipos, pero parte da sociedade aínda os toma por certos.

Moitas mozas e mozos en risco de exclusión padecen cada día as consecuencias de estigmas inxustos que pesan e discriminan.

Unha forma de combatelos é crear espazos para que sexan elas e eles mesmos quen poidan construír o seu relato da realidade. Coa súa propia voz e desde a súa propia visión.

“A Tribo” existe para iso. Trátase dunha experiencia de vídeo participativo capitaneada por 18 mozas e mozos de entre 14 e 23 anos. Elas e eles son protagonistas de todo o proceso de creación: desde a idea inicial ata a montaxe final.

Este proxecto, que compartimos por iniciativa de Agareso e co apoio da Obra Social “la Caixa”, defende que o acceso á cultura e ás tecnoloxías da comunicación debe darse sempre en condicións de igualdade.

Numerosos estudos teñen probado que é posible promover a igualdade social a través das artes. O contacto continuado coas artes fai posible que as mozas e mozos en dificultade melloren tanto os seus resultados na escola como o seu compromiso cívico e social.

Isto permite reducir a desigualdade de oportunidades con respecto á mocidade dun nivel socioeconómico máis alto.

Igaxes. Cambia su vida

Cambia a súa vida

Únete a igaxes para cambiar a vida de miles de nenas, nenos e mozos.

Contigo podemos darlles a protección e a educación que necesitan. Xuntos faremos posible que sexan de maiores o que soñan ser.