Na vivenda Mentor de Vigo, as rapazas e rapaces participaron na inciativa “Que pasa no barrio” que pretende fomentar a conexión entre a veciñanza.
No tránsito á vida adulta, a independencia económica non é o único factor fundamental para acadar unha vida digna. Outro punto importante é a “independencia social”: contar cunha rede de persoas para gozar do tempo de ocio, axudarnos ou, simplemente, falar dos nosos sentimentos.
A mocidade tutelada e extutelada traballa tódolos días coas súas educadoras para acadar esa independencia. Estas rapazas e rapaces normalmente atópanse nun círculo na que os seus contactos son as propias educadoras e compañeiras e compañeiros de vivenda, xa que a maioría das veces non contan cunha familia que as apoie ou non teñen a oportunidade de socializar máis alá. Cando comezan a transitar cara a vida adulta, este pequeno círculo vaise desfacendo xa que deben desvincularse do mesmo para acadar a independencia completa polo que moitas veces atópanse sen rede social coa que contar para pedir axuda ou pasar tempo de lecer de calidade. Non en tanto, ás veces atopamos oasis nos que a exclusión, o estigma e o illamento non teñen cabida como é o Solar da Pomba.
Na vivenda Mentor de Vigo, as rapazas e rapaces participaron na inciativa “Que pasa no barrio” que pretende fomentar a conexión entre a veciñanza. Así, o solar de Canellón da Pomba, foi cedido e acondicionado como punto de encontro entre persoas diversas e con diferentes obxectivos: desde celebración de aniversarios ata incluso facer batallas de galos cos amigos, como Jonathan, un dos rapaces da vivenda. Deste xeito, a xuventude da vivenda Mentor de Vigo tivo a oportunidade de pintar un mural cheo de palabras fermosas, acondicionar unha horta urbana e incluso poñer unha “neveira biblioteca” xunto co resto das veciñas e veciños.
A cooperación veciñal é unha aprendizaxe fermosa e unha oportunidade para xerar redes de apoio para estas rapazas e rapaces que saen do Sistema de Protección. Favorecer a participación de persoas en risco de exclusión en iniciativas comunitarias é unha forma de crear relacións naturais que doutro xeito non se darían. Crear vínculos, botar raíces, sentir pertenza… Tamén é loitar contra a exclusión social e a estigmatización da mocidade tutelada e extutelada.
Programa cofinanciado polo FSE+Galicia
Cambia a súa vida
Únete a igaxes para cambiar a vida de miles de nenas, nenos e mozos.
Contigo podemos darlles a protección e a educación que necesitan. Xuntos faremos posible que sexan de maiores o que soñan ser.